اسرار المذاكرة

قبل ما تحاول تعرف ازاي تذاكر وتنظم وقتك وكل الكلام ده، لازم ناخد وقفة نرتب فيها الدنيا جوانا، زي ما بيقولوا تنظيم الشغل نص الشغل، بس قبل ما نبدأ نرتب الدنيا بره نرتب الدنيا جوه عشان لما نبدأ مذاكرة ما يبقاش فيه جزء من طاقتنا رايح على حاجات شغالة جوانا من غير ما نكون واخدين بالنا منها او حتى مش قادر اتكلم فيها

هنعمل في الوقفة دي ايه طيب يا هندسة،

هقولك

حضرتك هتقعد مع نفسك قاعدة محترمة تحدد فيها انت عايز ايه وعايزه ليه ؟، وطبعا هتقولي انا عارف عايز ايه .. عايز اجيب مجموع كبير وادخل الكلية اللي عايزها، بس ده مش اللي انت عايزه، ده الطريق للي انت عايزه

خلينا ناخد مثال طالب علمي رياضة

ايه هدفك: عايز أجيب 97% وأدخل كلية هندسة. وبس وقف على كده

طالب تاني عايز ابقى مهندس في مجال الميكاترونيكس واسافر المانيا، وربنا يكرمني وممكن يبقى عندي بيزنس كويس، وعشان كده محتاج اتعب السنة دي شوية واذاكر واجيب مجموع 97% وادخل كلية هندسة

جرب الاتنين وانت تعرف الفرق في الشعور اللي طبعا بيفرق كتير.

طيب ليه بيفرق كتير؟
زي ما بيقولوا ع الانسان انه كائن عاطفي اكتر منه كائن منطقي، المشاعر اللي انت حسيتها من تخيلك انك مهندس وشغال في المانيا وعندك الحياة اللي انت بتحاول تبنيها بتفرز جواك هرمونات الدوبامين والسيرتونين والاكسيتوسين وطبعا ده يعتبر جرعة منشطات لدماغك

النص التاني ….

انك تعرف عايز ده ليه …. بمعنى اذا كان عندك غاية اكبر بيضاعف معاك جرعة التحفيز. مثال يعني ايه غاية اكبر

مثال

نكمل مع المهندس اللي في المانيا، ليكن على سبيل المثال انه عايز يعمل اختراع او حاجة تسهل حياة البشر وتساعدهم بشكل ما انهم يكونوا عايشين بشكل افضل، او يصنع فرق ما في البلد اللي هو اتولد فيها ويبقى بالاضافة انه عاش الحياة اللي رسمها لكنه اضاف قيمة معينة عشان يسيب بصمته، او عمل حاجة يبقى مبسوط وهو مقابل ربنا بها

بالطريقة دي يبقى عاش الحلم ” ربنا اتنا في الدنيا حسنة وفي الاخرة حسنة ”

الخلاصة

الناس بتيجي تفصل بعد كام شهر وتبدأ مرحلة اللعن والسب في الثانوية واللي فيها او لا قدر الله الاكتئاب لأنه بيكون اكتشف انه مش عارف بيعمل اللي بيعمله ده ليه حتى لو ما بيقولش كده، فبما ان الوقاية خير من العلاج

اقعد مع نفسك ومعاك ورقة وقلم واكتب هدفك او اهدافك والدوافع بتاعتك، واذا بتعرف ترسم ارسم ولو مش بتعرف شخبط، وتخيل نفسك بعد ما حققت الحاجة اللي انت عايزها دي

واحتفظ بالورقة اللي انت كتبت عليها الاهداف والدوافع والصورة الذهنية اللي انت تخيلتها، عشان هتحتاج الصورة دي كل مرة تتعب فيها، عشان تساعدك تشحن من جديد

شكرا على وقتكم وعلى الجروب الجميل

الى اللقاء في السر القادم

–

م / محمود شبايك

رابط قناة اليوتيوب
https://youtu.be/_4pp4guQMwY